محنة المندائيين

شكّد زرعنه..........شكّد سكّينه"
وجينه نحصد مالكّينه , بس لكّينه
سنبل مطشر مُردْ روحه اليباسْ
وناس مشبوحه تظنهه ماهي ناسْ
ودجلة تبجي وفرفحتْ روح الفراتْ
والبقه منهم كره حتى الحياةْ
والمحطات البقتْ كلهه حزينه
شكد زرعنه شكد سكينه

شكد سهرنه ..شكد نطرنه .كّلنه يمكن تجي الأيام الرزينه
ومن أجتْ كلّ الشباب أتشلبهتْ فوك السفينه
بيهه طلعتْ للسطوحْ
وبيهه بطلتْ ما تنوحْ
كّالت الاحزان ولّتْ والجروحْ
كلهه يمكن تلتئم والناس تعرفنه ولدْ هذا الوطنْ
واحنه منهم وهمه منّه ومايبدلنه الزمنْ
وسفه لاجن طلعت الشغله ثجيله
شكد زرعنه , شكد سكينه وجينه نحصد مالكينه
جينه( نطمش) مالكينه
ماي جاري وماطمشنه ولا( صبغنه)
وضاع كل ذاك تعبنه
دجله أحمر من كثر دم العبادْ
والمجازر عمت أرجاء البلاد
جا بعد ليش العمادْ
جا بعد وين العمادْ
والجتل عم المدينه , شكد زرعنه , شكد سكينه

شكد صبرنه , شكد مشينه
ردنه نوصل للجرف بلكي تلكفنه السفينه
ومن وصلنه طلعوا الطيبين منهم منتهينْ
والبقوا منهم عكارب من عذابا ت السنينْ
والبعض منهم نسوا طعم الحنينْ
ومن حجينه..طلع السفان مايدرك حجينه
وطلع الملاح ما يعرفْ اسمْ حتى نبينه
طلعنه غربه عن خشب هذي السفينه
طلعنه ُصُّبه النِكس بينه
واليسلم على يحيى
من يموت ويوم يولد , يوم يبعث عدلْ يكفر يسلّم علينه
يكره يسلّم علينه
والمحطات البقت كلهه حزينه
والمحطات البقت كلهه حزينه
كلهه حزينه

فهيم السليم
دهفه أديمانه
اوكلاند نيوزيلاند
22\5\2006