كنت أرفع الراس اكول

الشاعرة الكبيرة لميعة عباس عمارة

الخميس
01/02/2007

كنت ارفع الراس اكول
آنة من النهرين
أهلي أساس الحضارة العلت الألفين
واليوم
صرت انحرج لو سألوا انت منين
غمك بعظمي الحزن
والوجع شل فكري
وآنه ابتسم
حتى اغطي حيرتي وقهري
يارب أفرغ علي صبرا ، وهى صبري
يارب أفرغ علي صبرا ، وهى صبري

يمي الكصايبها بيها السعف متغاوي
من عتبة الخير بيتج بالفرح ضاوي
ياوسفه هسه التفتي لعشنا الخاوي
بحسرة علشوفة وداع ودمعتج تجري
ومنين احط لي جناح ولمي بيه اسري
يارب أفرغ علي صبرا ، وهى صبري
يارب أفرغ علي صبرا ، وهى صبري
يارايحين الحلب عوجوا على بغداد
أخذولي وياكم دوا ، وحليب للأولاد
صعب وطويل الطريق ، وخطر واهلي بعاد
والغربة طالت ، وطالت ، وانتهى عمري
لا النوح خفف ، و لا هو من الوجع يبري
يارب أفرغ علي صبرا ، وهى صبري
يارب أفرغ علي صبرا ، وهى صبري