اٍلى جميع من يعانون أينما كانوا أهدي هذه القصيده

فهيم عيسى السليم


الهور والخبز والناس
لاهور لاطعم الخُبُزْ لا ريحته الطيبهْ , لاناس التهزّ الكاعْ بيهه الخير والهَيبهْ
جا المنْ تظلْ مذلولْ
جاعودْ الوجع ديزولْ
موذاكه اليجر بالطولْ, مو هذا اليعر ويكولْ
مو هورك صبخ كيعانْ , مو خبزك نوه واٍدنانْ, مو ناسَكْ غدت خرفانْ, لو غربانْ
مو كاعك غدت تابوت للشجعانْ ,موخيرك شبع نسيانْ
والمهيوبْ ظلْ مهيوبْ بس بكولة النسوانْ
والناس التهزّ الكاعْ كامت تنشره وتنباعْ , والناس التحب الخيرْ تتجقلب تصير أضباعْ
وجا ألمن تظل مهييوبْ
والراكب غده مركوبْ
عود الوطن ها المحبوبْ , عود أحنه بمحبته أنذوبْ
ظني الوطنْ طلعتْ نخلته عوجهْ , ومجاتل على التمراتْ بس روجه تطك روجه
والصافي لبو الويلاد ناصبلك ألف نوجهْ
مالك كل سمج بالشطْ , مالك ريحةالزيتونْ , مالك كل جمال الكونْ
مالك كل طيور البرْ , مالك كل عيون الشرْ, مالك كل جمادْ وكل شجر أخضرْ
مالك كل كلب ينبضْ , مالك كلشي يتنفسْ , مالك كلشي يتحسرْ
وهذا الملك عد ابليسْ ماظني برضه يسيبهْ
لاهورلا طعم الخبز لا ريحته الطيبه , لا ناس التهز الكاع بيهه الخير والهيبه
وجا عمي لويش الاوفْ
جي طايح علينه الطوفْ
جي أعمه ويدوّر شوفْ
جي طعم الخبز مولاسْ ,جي هذا الوطن ينداسْ , جي ماكو فرد ترباس
وي فشكات تنحط بسدر خاينْ ,وي فشكات تكضي قصة الفاينْ
كلهه تكول مو فاينْ ابن فاينْ , لاجن كل عيون الخير ممزوكه ولا تعاينْ
لاجن كل كلب ملجوع من الخوف والخيبهْ
لاهور لاطعم الخبز لاريحته الطيبه ,لاناس التهز الكاع بيه الخير والهيبه
جا المن تظل محصورْ
موعمرك كضه بالزورْ
مودمك أبد مهدورْ ,وجم ناعور فريت باثر ناعورْ
فريت وطحت والكاع بيك اتدور ,كلهه اتدور كلهه اتدور
ظني الوطن ناعوره يشيل أسيانْ , ظني الوطن مكتوبه بلا عنوانْ
ظني الوطن كهوه وهيل لاجن ما أله فنجانْ
واحنه اندور كلنه اندور بلكي اتعود ذيجه العيشه الحبيبهْ
لاهور لاطعم الخبز لاريحته الطيبه ,لاناس التهز الكاع بيهه الخير والهيبه
جا المن تظل موجوعْ ...وجا المن تكت ادموعْ ...وفروخك يطكهه الجوعْ
والناس الكضت بالطيبْ كلهه اتصيحْ كلهه اتلوعْ
ظني الوطن برحيّه بلا تلكيحْ, ظني الوطن بلسانه شرُمْ مايصيحْ
واحنه ندورْ كلنه ندورْ بس دموعْ بس الجوعْ بلكي تعود ذيجه العيشه الحبَيبهْ
لاهور لا طعم الخبز لاريحته الطيبه , لاناس التهزّ الكاع بيهه الخير والهيبه
جا المن تظل مسجون ْ , وجا المن تظل محزونْ , كل عمرك كضه مسكونْ
جم عفريت جم ساحر تراوالك ْجم راكوصْ جم دجّالْ شلْ حالكْ
جم طنطل سِكمْ عقلك شغل بالكْ ...بس حيله وجذب وأوهامْ
متخلي الانام تنام , محروك الكلب محتامْ , وتروح وتجي الأيامْ
وحنه ندور , كلنا ندور , وتفلّش الف ناعورْ , بكلي ايعود صوت الناس, لون الكاع, طعم الماي
ولكم ديرتي شالتْ , ولكم ديرتي غْرَيبهْ
لاهور لا طعم الخبز لا ريحته الطيبه , لاناس التهز الكاع بيهه الخير والهيبه
جاالمن تظل همّالْ , بس الدمع يتجارى ويهيج الحالْ
ظني الوطن بيرغ ماأله شيّالْ, ظني الوطن ناكه ومالها جمّالْ
ظني الوطن سوباط بعنب حمّالْ , لاجن سلتك ياخوي مزروفهْ
تستنكي العنب حضنات بس عينك تره تشوفهْ
جم عنكود كترته وكلت عوفهْ , وجم سلّه باثر سلّه باثر سلّهْ
حتى الضوكْ بويه الضوكْ كلت الضوك مايبري تره العله
ماتدري السلال اتصير بالوعهْ
والصافي لبو الويلاد مرجوعهْ
والناس الكضت بالطيب تكضي العمر ملجوعهْ
هذا الهول ياهاالناس حتى الجاهل يشيبهْ
لاهور لاطعم الخبز لاريحته الطيبه ,لاناس التهز الكاع بيهه الخير والهيبه
جاالمن تظل ملتاعْ وصاير للسفينه شراعْ
عود انته التحب الماي عود انته التحب الكاعْ
ظني الوطن سالوفه حزن وافراكْ ظني الوطن تفكة ويلْ لاجن مالها تفّاكْ
ظني الوطن بت عشرين مهجوره وبلا عشاكْ
جاجرحك يبو الكلفات منهو اليكدر يطيبه
لاهور لاطعم الخبز لاريحته الطيبه ,لاناس التهز الكاع بيهه الخير والهيبه
جاالمن تظل محتار ؟ عود النخل عود الكاعْ عود الدارْ
مو كبلك جثيره أخيارْ , مسموره بالف بسمارْ ومربوطه بحبل جرّارْ
مسحوره بالف سحّار , يسحره السعف والماي , يسحره بجي البجّاي
يسحره استكان الجاي , يسحرهه حلو مافاتْ , يسحرهه الجديد الجاي
يسحرهه ابو نوّاسْ , يسحرهه الطرف والناسْ , يسحرهه الكِصَبْ والزورْ , يسحرهه جمال الهورْ
تعشك شوفة البردي وضوه التنورْ
تطربهه الابوذيه , يسحرهه مقام بليلْ يطربهه اذا غاب المغني بطورْ
يطربهه صِفير الريلْ
يشفيهه المِسِج والهيلْ
يشفيه حليب النوكْ , ويرويهه الفرات اتضوكْ بس اتضوكْ
مو كبلك جثيره أخيارْ كلهه أنجومْ , هم فوك النجوم اتلوك
يسحرهه الوطن والدينْ
يغويهه حمار الطينْ
يحييهه برد تشرينْ ,جي سدر الحنينه بالدفو يغيبهْ
فك عينه بحلم سحره , فك عينه وفهم سره, فك عينه السمه ادّثره
وعرف موته بدوه ايطيبه, عرف موته بدوه ايطيبه
لاهورْ لاطعم الخبزْ لا ريحته الطيبه
متمزّق تظل للموت جي راضع هاالحليبهْ
متشرد تظل للموت جي طيب ابن طيبهْ
فهيم عيسى السليم
اوكلاند نيوزيلاند
16\8\97