تمر الايام وتذوي تحت ركام الزمن طفولتنا الجميله ولكن
القهقري يعود بنا الى الوراء ....الى الماضي الى الطفوله
والطيبه والمحنه اه ياطاحونة الزمن لقد انتهى العمر ونحن
رديت الچ ديرة هلي
رديت با بصرة هلي
حضنيني ابلهفة محب
وبصوت عالي هلهلي
يگلي الوكت موش اهيه الك
أصرخ واگولن كلها لي
رديت وهموم المدن
بجيوبي مليانه ملي
دموع وقهر
نوح وسهر
والغربه بيها مبتلي
صارت غصب گوه علي
يله يا بصره شملي
الدموع نشفت والشفاه اتصيح
ياهو اليشتري
وينه الرباط
النهر ناشف والوجوه امغبره
نتناه لو ما يمتلي
مد وجزر
صار الجزر والمد تركنا
وخندگك علگم شري
دينار ما جنه انس
ما ظن اجاه العيد يتناه من امس
فرحه وعرس
العشار غنوة شوگ الك
ياباسم وخالد طفولتنا ملك
كلهم هلك كلهم هلي
بس صيح عونك ها بلي
نذكر ايام الطفوله والمحبه والمحنه
والحسينيه العزيزه
وشارع المترب همومه تنجلي
يحجي للاجيال قصه
قصته ما تنطري
ومدرستنا اشحلو اسمها
مدرسة گرمة علي
اذكر اسليمان يصرخ
گولو دار گولو دور
مايگول اسم المحله والمدينه
ونبقى احنا بأنتظار
امشي مشية مستقيم ولا تدور
ولا تشم ريحة بخور
أكتب ..اكتب ولا تحط اسم الوطن
بين السطور
وأحنا ابسدني يباسم نذكر ايام الصغر
شلون خلص هاالعمر
شلون دارت الاسطوانه
وتاه من عدنا الگمر
بيش خلص ها العمر
لسه وايام الطمامه وجسر الاحمر
والتميميه
ولسه بستاتك فؤاد اتصيح بصره
وتصدح ابغنوة فجر
صدگ خلص هل العمر
خلص ابلوعة سجن
خلص ابسجن الرمادي والعماره
قاعه خمسه قاعه سته
مدري خلصنا اشكثر
والجناسي صارت اوراق المحقق
وشرطة البصره التدقق
وجعفر أغائي وفاضل
صارو النا اصدقاء
وشرطة التسفير محراب الصلاه
تحضن اسباع وأباه
هذا ضلعي انكسر ذكرى
ورد تجبر
يمته يتحقق مناه
ضاع ليل الانتظار
وصاحت الغبشه تره صار النهار
مدري ظلمه مدري نور
ننتظر دشت حمد
بلگي ياتينا القطار
تالي طلعت سكه ماكو
والمحطه قفلت بيبانها
وأحنا نحلم نحلم انخط الشعار
ومدري احنا شنهو صار
هم نظل نتني القطار
ويا قطار أيگول عونك
ويشيل مكسور الجناح
ضاع من عنده الصباح
تاه لا حرثه أبطريقه
وچفه ايلاوي الرياح
وراح ....راح
راح للظلمه يدور
خلص عمره
والعظم ابدا ما لاح
الرباط- العشار- الحسينيه – شارع المترب- الطمامه-جسر الاحمر-التميميه- محلات في البصره
الخندگ- نهر في البصره
انس دينار-شارع البصره الرئيسي
باسم عبد الرزاق- خالد عبد الرزاق-اصدقاء الطفوله
اسليمان- معلمنا في المدرسه الابتدائي
فؤاد – مطرب الشعب فؤاد سالم
جعفر أغائي- فاضل ...رجال الامن في البصره
العظم- لعبة اعظيم الاح