يافَخرْ العروبة ومهد الأجدادْ

ياواحة خيــر للرايِحْ وللـرّاد

يغنوَة شوگ بشفاف اليغَنون

إشحلاتَه إسمچ من ينذكر بَغداد

عروس الرافدين إنتِ يمزيونه

هنيّالهْ التوَسَّد گاعچ وألف خيعونه

تراها الروحْ يَمچ بقَتْ مَرهونَه

يـمــن فرگاچ خلَّهْ الگلبْ رْمادْ

عـزيــزة وبالگلب تبقـين بغداد

بالغربة ضاع العمر وراحت سنين

وغريب الدار تايِهْ وانتِ تدرين

بس أنتِ شكو ماكو تــسـألين

وأرد أشكي جَرح مافاده لضْماد

تعَّـبني الصبر والله يبغـداد

تعبَتْ وشاخَتْ كل مدنهه الكون

بَسْ حسنچ بقَه تزهيلَه العيون

ياأرض إنجبَتْ المنصور وهارون

وتزيَّن إسمچ بعشتار وشَبعاد

لبيع الدنيَــه ْ لعيــونچ يبغداد

إشتگتْ أگعدْ علَ دجلَه وشاطيَّه

وأتنسَّـم عبيــرهْ بليـلَه گمرِيَّهْ

لَردْ ردود مادام النفَـسْ بــيَّه

العمر دونچ لايسوَهْ ولايرّادْ

لبــيع العمر لعيونچ يبغداد

أخذني الشوگ علَ لمَّة الطيبين

أهلنَه ْ أهلْ المضايف والدواوين

شْعمَل بينه فراگهم يحبيبهْ تدْرين

بجمر مچوي الگلب من وره البعاد

حسافه فارگنَهْ عيونچ يبغـداد

ياأم الخيــر ودّي لو تلمّـينــه

چفچ مثــل چفْ أمّي الحنينـة

أرد من ماي دجلَه العطَش تروينه

ونسمات العَصاري تداوي الاولاد

ينور العيــن ياحلوة يـــبغداد