بـيـَـشْ ابْـلـَـشِـتْ .. يابـو بـشـتْ - جَمْرَكْ ولك نارَه هِـفــَـتْ
هالضاعْ من عـدْنـَـه الوَطـَـنْ – هالضعـْـنـَه ضيعّـنـَه الوَكتْ
واسـْـهامْ جَـرْحَـكْ بالضلعْ – يـرْمي نچـَـخْ سـَــهْـمَـه نـبـَـتْ
صَـرْخـَـة غـَـضَـبْ ماتـنسـمعْ – لـَـهْـبَـة وجَـعْ صارَتْ خَفتْ
رَعْـشـَـة رعـبْ خوفْ اوألمْ – تحرگْ حَرگْ صيَـفْ الوَكتْ
چــذْبِ اودَجَـلْ وابْـلا خـَجَـلْ – ماكـو عَـمَـلْ بـَـسْ الهـَـفـتْ
ماضَـلْ بَـعَـــدْ بَـسْ الحــزنْ – جـــورْ اوظـلمْ هـذا الـنِـلـتْ
دَمْـعـي اخـْـتـِلـَـطْ وَيـَّـه المطـَـرْ – مـنْ الهـَـضمْ حيَـلْ اتـْـعَـبـِتْ
***
صَبَّتْ دموعْ العيَنْ تـبْچي على الراح
ليشْ الوَطنْ مذبـوحْ والحكم سـفـّـاحْ
***
شـَـعـبْ العراق اسهامْ يحْمي وَطـَنـَّـه
يــرْمي اليخـونـَه ايريدْ يذبَـحْ أَمَلـْـنـَـه
***
اسـنـيـنْ العـمرْ راحَـتْ هَـدرْ – سَـهْـمي الغـَـدرْ هالحَـصَلـِتْ
راحْ الفـَـرَحْ راحْ الأَمَـلْ – خـيَـبَـه اوألـَـمْ سَـلـْـوَه اصْبَـحَـتْ
اشـْـبَـعـْـنـَـه بَـچي اشـْـبَـعـْـنـَـه لـَـطمْ – عَ الزِلمْ وَسْفـَه اتذَبـِحَـتْ
صارْ الحـكـُـمْ بـيـدْ التـَـتـَـرْ – و التـَـتـَـرْ بـيْـنـَـه اتـْـحَـكـمَـتْ
طالـَـتْ شــواربْـهَـه الزِلـمْ – والعگـلْ كِـلـْهـَـه اتـْـنـَـكِـّـسَــتْ
باعَـوْ رَقـيـقْ اعْـلـَـه الغـربْ – سـنـْـجارْ كِـلـْهَـه اتـفـَـرْهِدَتْ
( الـنـّـونْ ) عَ البـيَـتْ انـْكِـتـَـبْ – والزلـمْ بـيـهَـه اتـكـَـتـِـلـَـتْ
كـلـْهَـه عـلى ارباحْ النـَـفـط – واعـْـيـونْ دَوْلـَـتـْـنـَـه عِـمَـتْ
***
فـِدْوَه عِـراقْ الخير يابو الحضارات
كسْـرَوْ ابضلعك ليش ذوله الحثالات
***
إنهـَـض يبوْ الشدّاتْ بيكْ الأمل بيكْ
شـَـعبـَـكْ عراق الخيَرْ خيَرَه يداويك
***
والشـَـعَـبْ يافـگـْـرَه الشـَـعَـبْ – يـشـْـرَبْ اوياكـلْ بالزِفـتْ
فـَـصْخـونـَـه خـو فـخـْـذ اوچـِـتـفْ – كيكـَـة ذهَبْ واتـقـَسِمَتْ
( شـيـتـَـلْ اويـونـسْ ) مابـقـَـوْ – اگـْـبـورهـمْ واتـْـفـَـلِـشـَــتْ
يا رَبّي يـاربْ العَـرشْ – هَـالـْـرســـلْ مابـيـهـمْ بَـخـَـــتْ ؟
يا شـَـعَـبْ يـعْـراقي الأبـي – اشـمالـَـكْ عـلى الحَـقْ اسكـَـتِـتْ
ليـوَيـَـنْ تـاليـهـَـه اوبَـعـَـدْ – يَـمْريـكـَـه گـلـّـيـلي اشـْـوَكـتْ ؟
ما صَـدّگْ الغـيـرَه انـْـتِـهَتْ - الدنـّـيَـه چَـنـْـهَـه اتـْـغـَـيــِـرَتْ
مَقـْـبَـضْنـَـه كـلشي اوللأسَـفْ – واغـْـسَـلنَه اديَـنـَـه اوبالطـَـشتْ
بــيـَـشْ ابْـلـَـشِـتْ ... يابـو بـشـتْ - جَمْرَكْ ولك نارَه هِـفــَـتْ