صارت هاذي تشبه ذيچ – نفس المرگه او نفس الديچ

تنزلْ طيّارَه او بالكيفْ

من بيروت الحَدْ تلكيفْ

يُعدَمْ ليخالفْ بالسيفْ

بغداد الحاكمْ يسبيچْ - صارت هذي تشبه ذيچ

چنّه ابواحد جَتنَه ألوف

گلب ْايسوف او عين اتشوفْ

جرح ايخَزن جَرح انروف

يادنيه بَسچْ واشبيچْ - نفس المرگه او نفس الديچ

كتْبوْ تاريخْك بالدَمْ

الياخذ أمَكْ صايرْ عَمْ

لمْلومْ ابغداد التَمْ

لچتافْ إيفَرچْ تَفريچْ - صارت هاذي تشبه ذيچ

بوگْ اونَهبْ سَلبْ انشوفْ

مو بالخفيه عَ المَكشوفْ

ابْگوَّة عينْ او ماكو خوفْ

بغداد منهو اليحميچْ - نفس المرگه او نفس الديچ

بالسوگْ انْباعَتْ أصواتْ

بَـطانـيـَـه لو بَـنـكـاتْ

هَلهولـَه عَلـْگـَـوْ راياتْ

جولـَه اوصولـَه بَسْ اصْريچْ* - صارت هاذي تشبه ذيچ

نايبْنَه اسم الله  اسم الله

مَحْروسْ امحَصَنْ بالله

مَعْـلولْ .. النايبْ علـَّه

شَعْبچْ يا علـَّه ايرَبيچْ - نفس المرگه او نفس الديچ

مُرْ إجرَعْنَه يا زَمانْ

يذبَحْ يظلمْ ماكو أمانْ

قانون أحوال النسوانْ

*يا أم گـَـبـْعـَه ..الرَبـچْ نشكيـچْ - صارت هاذي تشبه ذيچ

قصَتْـنـَه صارَتْ بالوَصفْ

ما ضَلْ نَفطْ كلـَّه انكرَفْ

كـلنَه انتخَبْنَه ابلا عرفْ

هالفكرْ .. يا يـُمَّه رچيچْ - نفس المرگه او نفس الديچ

من يومْ عشْنَه ابهالوَطَنْ

واحدنَه بالهَـمْ ممتحـنْ

چَمْ دوبْ نسكتْ عَ المحَنْ

دايرْ واندورْ اوبيچْ - صارت هاذي تشبه ذيچ

هذي الحكومَه امزَيفَه

توعدْ اوماكو كلْ وفَه

ذاك الجرَه اوهذا الصفَه

ماكو قفلْ لاكو اسويچْ - نفس المرگه او نفس الديچ

*اصريچ :- الصوت النشاز

*ام گبعة:- نائبة في البرلمان العراقي خرجت في (بي بي سي) العربية وهي تدافع عن تشريع يرا د تعميمه وهو السماح بزواج الفتيات بسن التاسعة وتقول انه من التشريعات الالهية وتتحدث بثقة مابعدها ثقة عن استعداد الاطفال البيلوجي والنفسي للزواج في هذه السن.