تمنينة من الوَكت
تنهبنة بسكوت نَسمات الفرح
لبعيد .. لعيون الشمس
مَنشوف من الحِزن كًطرة
تمنينة ونسة مْحبين يبللها النِدة
سواكًي وفة تحجي للوادم
سوالف معَزبين لمعانة بضوة الكًمرة
تمنينة العْذيبي يدوم
يتلاعب بحسن الحديثات
شَهد مَعجون برطَب تَمرة
تمنينة من الوطن
شبكًة عمر تظل للدوم
تذوب بيها العيون بشَرايين الدمع
مو نَزوة عشكً
ساعة وينكًضي وَطرة
أثاري الحلم جَذاب
يدولب كِل أعمى كًلب
ويمَني العَطشان بماي وكًاع خَضرة
تالي القَبض بَس صَم نخال
مِثل ذاك التمنى وسيع الدار
ويصفة بطركً حِجرة
شيفيد بَعد الحَجي
لو ينباكً الحلم من حضن الأيام
حَنظل يصير العيش
وزحوف يمشي العمر حَسرة بأثر حَسرة
جَم دوب نظل ننطر فَجر
بعد ما تَيهَت الغبشة ضحكات الصبح
والظلمة خنكًت شموع العرس
مابكًة غير الآهات باتت بالصَدر جَمرة
جَويات الغرُب تاه حساب لَجعَتهن
والهموم صارن سَلوة من هجَر
وياهن ضاع حَد الصَبر
حطبات يصيرن الضلوع
وفحَم يغدي الكًلب من ينكًضي صَبرة
فحَم يغدي الكًلب من ينكًضي صَبرة