إجيتچ .. وعله شفافي الچلمات تتراجَف .. وبنغم عودچ تعذبيني
إجيتچ .. وبعلو شبرين عن الگاع ..على صدرچ دَ ضميني
إجيتچ .. ناگل الشهگات والدمعات .. متروسه فراگيني
جايب الروميل والحنه بـ ميازيني
جايب الغِنوات والفرحه بـ شكابيني
ملّاح .. ببحور العشگ .. و شراعچ يدَلّيني
و گليلي .. من كون آنه اغلطت بالشوگ گليلي
يا أحله سالوفة عشگ .. غَـنّتْ مواويلي
تدريني .. طفل مفطوم من الديس .. والعَبّره تسليني
آنه جفن سهران .. بسنين الصبر .. نَيّميني
آنه جدم تعبان .. من ممشه العشگ والشوگ .. هَيّديني
أنه ابنادم .. امسيس بحادور الوكت .. ما چالي إلـ يوچیني
لا روج .. لا سفان .. لا محبوب اليبايعني ويشاريني
مشدوه .. شادهني الوكت .. وبحسراته يسگيني
چمدوب مفكوك الگلب للشوگ .. و لَچماته صدگ تاذيني
و شِدِّني .. عليچ المندي والگنزه .. بطرف الگصيبه هناك شدّيني
عَـليچ بـ شيخ داخل .. مو تِفِليني
أنه زين .. او ذَبني الزِمان ابعيد .. عن شيني
عِثگ .. من نخل الوفه .. والعاگول يحويني
كحل ..غافي بطرف عينچ .. لا تِندهيني
آنه غيوم مَطّاره .. و ريحچ يـ بغداد العشگ .. تلّويني
آنه شَتله بأرض ذي قار .. و گطره من جرف دِجله .. تِرَوّيني
تِحمّلت العطش واللوع .. من نشفن بساتيني
و جرعت الصبر مرات .. من فُرغَن ميازيني
ومن ضيمچ .. حصدت الآه .. نص الآه يازيني
او صرت بالسوم .. وبحشفة تمر يحديثه تسوميني
و تريديني ؟؟؟
جريب من الجرح .. بلسم على جروحچ .. تريديني
لا .. أريد أهجر و جافي الشوگ الـ بعينچ .. و رِد زيني
أريد أكتب شِعِر ولهان .. منظوم ابـ نياشيني
أريد أبچي الوِفَه .. يا صاح ياذيني
و أگلچ یا صبر .. حنظل تضوّگیني
هينيالچ .. تعرفين الجِفه .. بالله عليچ عَلمیني
بالله عليچ عَلميني
31.12.1973
ناصرية