إجيتچ .. وعله شفافي الچلمات تتراجَف .. وبنغم عودچ تعذبيني
إجيتچ .. وبعلو شبرين عن الگاع .. إلـ صدرچ تضميني
إجيتچ .. ناگل الشهگات والدمعات .. ياما أثگل فراگيني
إجيتيچ جايب الروميل والحنه بـ ميازيني
جـايـب الغِـنوات والفـرحـه بـ شـكابـيـني
أنـه مَلّاح .. ببحور العشگ .. و شراعچ يدَلّيني
و گـليلي .. من كـون آنه اغلطت بالشوگ گليلي
يـا أحــله ســالوفـة عشگ .. غَــنّـتْ مـواويــلي
تدريني .. طفل مفطوم من الديس .. والعَبّره تسليني
تدريني .. جـفن سـهران .. بليـالي الصـبر .. نَيّـميني
تدريني .. جدم تعبان .. من ممشه العشگ والشوگ .. هَيّديني
أنـه ابنادم .. امسيس بحـادور الوكـت .. ما چالي إلـ يوچـیـني
لا روج .. لا ســــــفان .. لا مـحـبـوب اليـبايـعـني ويشـاريـني
مــشـدوه .. شــادهـني الوكـت .. والحسـرات تـسگـيـني
چمدوب مفكوك الگلب للشوگ .. و لَچمات الچِذِب تاذيني
و شِدِّني .. عليچ المندي والگنزه .. بطرف الگصيبه هناك شدّيني
عَـليچ بـ شــيخ داخـــــــــــــل .. مـو تِـفِـلـيـني
أنه الزين .. او ذَبني الزِمان ابعيد .. عن شيني
آنـه عِـثگ .. من نخل الوفه .. والعـاگول يحويني
آنــه كِــحل ..غــافي بطرف عـينچ .. لا تِـندهـيني
آنه غــيوم مَــطّاره .. و ريحچ يـ بغـــداد العـشگ .. تلّويني
آنه شَتله بأرض ذي قار .. و گطره من جرف دِجله .. تِرَوّيني
تِحمّلت العطش واللوع .. من نشفن بساتيني
و جرعت الصبر مرات .. من فُرغَن ميازيني
ومن ضيمچ .. حصدت الآه .. نص الآه يازيني
او صرت بالسوم .. وبحشفة تمر يحديثه تسوميني
و تـريـديني ... !!؟
جـريب من الجـرح .. بَلسـم على جـروحچ .. تريـديـني
لا .. أريد أهجر و جافي الشوگ الـ بعينچ .. و رِد زيني
أريد أكتب شِعِر ولهان .. منظوم ابـ نياشيني
أريـد أبـچي الوِفَــه .. يا صـــاح ياذيـني
و أشوفچ یا صبــر .. حـنظل تضوّگـیني
هينيالچ .. تعرفين الجِفه .. بالله عليچ عَلمیني
بالله عليچ عَلميني
31.12.1973
ناصرية