...... ارد انشدج
صدت اعيونج كره لو حب اليه
لو دلع بنت الفرات الماروت من غير ميه
...... جيت انشدج
..... جاوبيني
شارع العشرين مايجبري خاطر
وي فلك طره
اشكثر مني يتحمل خطية
أنه من صباي موعود اعلى شوكَه
اشكَد تمرغت اعله كَلبه ودست فوكَه
من حليب اترابه رباني وحملني
اسنين يابو اسنين دفاني وحضني
واشكثر حلوه الليالي وياه مرت
عاشرتني بطعم مرهه وعاشرتهه
حرز فوكَـ الزند من زغري شلتهه
جانت احلى ايام عمري
وغنوة العشرين هيه
ياشارع العشرين رديت اعلى شوكَك
....بالخمسين العمر
اشجابني واشوده بيه
.... ارد انشدج جاوبيني
هم مشيتي بجدمج الترفه على الحبوبي يوم
دستي ع ترابه وجزيتي
اشكد حملتي اذوب منه وما دريتي
شارع الحبوبي ياحلوه يعثر
ياعذاباتي وحسرتي
وياجمال الناصرية
ياهوه عذيبي يلفحة شوكَـ
يازهره نديه
..... جاوبيني
يالضحكتج غنوه بحلوك الزغار بيوم عيد
يلي اسمج احلى نغمه ابين جلمات القصيد
ومن يلوح اهلال وجهج روحي تجفل
وبسحر عيناج اتيهن ياعيون النرجسية
ياهوه الحبوبي والعشرين
ياسحر الفرات ... ويافخاتي الناصرية